१८ जेठ । गण्डकी प्रदेश सांसद ओमकला गौतमले कावासोती नगरगपालिका वडानम्वर ८ बस्ने ८२ वर्षकी जसोदा अधिकारीको मृत्यु प्रकरणमा दोषीलाई कडा कारवाही गर्न माग गरेकी छिन् । समाजमा रहनुभएका जेष्ठ नागरिकलाई राज्यले त सम्मान र संरक्षण गरेको सन्दर्भमा आफ्नै घरका परिवारले हत्या गरेको किटानी जाहेरी दिइसकेको समयमा घटनाको सत्य तथ्य छानविन गरी दोषीलाई हदै सम्मको सजाय दिन माग गरेकी हुन्। सांसद गौतमले आज एक विज्ञप्ती जारी गर्दै भनिन्, ''वुहारी ले नै आफ्नै ८२ वर्षीय सासु अधिकारीको हत्या गरेको भनी छोराले किटानी जाहेरी दिइसकेको ले प्रहरीले छानविनमा ढिलाई नगर्न आग्रह गर्दछु । २१ औँ शताव्दीमा समेत मानवियता हराएर वृद्धाको हत्या गर्नुले समाजमा यस्ता विकृत मानसिकताको तत्काल उपचार कडा कारवाहीबाट हुनुपर्छ ताकी फेरि यस्तो जघन्य अपराध दोहोरीन नपाओस् । ”
सांसद गौतमले निर्दोष फस्न नपाउने र दोषी उम्कने नसक्ने गरी छानविन गर्नुपर्ने भन्दै मृतक अधिकारीप्रति हार्दिक श्रद्धान्जली व्यक्त गर्दै शोक सन्तब्त परिवार जनमा धैर्य धारण गर्ने शक्ति मिलोस भनीन् । साथै छोराले घटनाको सत्य तथ्य छानविन गर्न प्रहरीमा दिएको उजुरीको उच्च सम्मान गर्दै आफूलाई जन्मदिने आमाको माया र ममताका लागि कहिल्यै असत्यको बाटो हिंड्न नहुने बताइन्।
यसैविच जिल्ला प्रहरी कार्यालय नवलपुरले पनि हिजो विहान साँढे ४ बजेको घटना भएको भन्दै ट्वाईलेट जाने क्रममा अचानक लडी घाईते भएकीमा उपचारको लागि मध्यबिन्दु अस्पताल लैजादा मृत्यु भएको भन्ने बिहान सात बजेको समयमा सूचना आएको र त्यसपछि घट्नाको अनुसन्धानको लागि खटिएको प्रहरी टोलीले स्थलगत रुपमा घट्नास्थलको प्रकृती, मृतक जसुदा अधिकारीको अबस्था, निजको शरिरमा लागेको घाँउ चोटपटकहरुको प्रकृती अध्ययन गर्दा मृतकको टाउकोमा पटक पटक प्रहार गरेको घाँउ चोट देखिएको, घट्नास्थल अस्वभाविक अबस्थामा रहेको देखिएको र मृतकको छोरा चन्द्रकान्त अधिकारीले समेत आमा जसोदा अधिकारीको मृत्यु श्रीमती निरा खत्री अधिकारीको कुटपिटबाट भएको भन्ने ब्यहोराको जाहेरी पर्न आएको भन्ने जानकारी दिएको छ ।
मृतकको बुहारी बर्ष ४० की निरा खत्री अधिकारीलाई हिजो नै पक्राउ गरी कर्तब्य ज्यान मुद्दामा नवलपुर जिल्ला अदालतबाट म्याद थप अनुमती लिई आवश्यक अनुसन्धान कार्य भईरहेको सुचना अधिकृत प्रहरी नायव उपरीक्षक मोहन बहादुर खाँणले जानकारी दिए ।
