नवलपुर : नेकपाको दाहाल नेपाल समुहका नेता योगेश भट्टराईले प्रधानमन्त्री केपी ओलिले नेतृत्व गरेको पार्टीमा मण्डलेहरु हावी भएको आरोप लगाएका छन् । उनले ओलीको पार्टी मन्डले र भ्रष्टहरुले भरिएको बताए ।
नवलपुरको कावासोतीमा शनिबार दिउँसो आफु निकट युवा विद्यार्थी हरुको प्रशिक्षण कार्यक्रममा बोल्दै भट्टराईले भने , "पन्चायतकालमा बुटवलमा घनश्याम भुसाल , कृष्ण पौडेलहरुलाई खाल्डो खनेर पुर्न खोज्ने मण्डलेहरु अहिले ओलिको दलमा छन् , पुर्ब पन्च , मण्डले र अबसरबादीहरु उनको पछि छन् । " भट्टराईले ओली प्रतिगमनको मुख्य कर्ता भएको भन्दै उनको सबै कदम त्यतातर्फ उन्मुख रहेको टिप्पणी गरे । उनले पुर्ब राजा ज्ञानेन्द्र र ओलीको एउटै पार्टी बने त्यो आश्चर्य नहुने बताए । उनले भने, 'प्रधानमन्त्रीको हरेक कदम गणतन्त्र र संघीयता विरोधी छ दुबै जना अध्यक्ष रहेको पार्टी बन्यो भने आश्चर्य हुने छैन । ओलीका सबै कदम त्यतातर्फ उन्मुख छन् । यी दुवै अध्यक्ष रहेको पार्टी बन्छ बन्छ त्यो दिन टाढा छैन ।'
मण्डले र गणतन्त्रविरोधी झुण्डमा बसेर उनले (ओली) संविधानमा व्यवस्थै नभएको धारा भनेर निर्वाचित प्रतिनिधिसभा भंग गरे', उनले भने, 'जनअधिकार खोस्ने नालायक र तानाशाहका रुपमा उनी इतिहासमा रहनेछन् ।' प्रधानमन्त्री ओली नेपालका यसअघिका ४० जना प्रधानमन्त्रीभन्दा नालायक र जनअधिकार खोस्ने तानाशाहका रुपमा उदाएको उनले बताए ।
निर्वाचित जनप्रतिनिधिलाई काम गर्न नदिएर उनले 'म नै राज्य हुँ' भन्ने मान्यता बोकेका कारण ओलीलाई सबैले छोड्दै गएको योगेशले दाबी गरे । भट्टराईले बिपि , गणेशमान , गिरिजा र सुशिल कोईरालालाई संबोधनका क्रममा पटक पटक सम्झिए । उनिहरुको त्याग योगदान र सादगीपनको प्रशंसा गरेका भट्टराईले ओलीले पुष्पलाल , मदन भन्डारी र मनमोहन अधिकारीको अनुयायी हुँ भन्ने हैसियत गुमाएको बताए । कार्यक्रममा युबा संघका संयोजक दिपशिखा , अनेरास्ववियुका सह संयोजक रन्जित तामाङ , नरेश शाही , मदन गिरि लगायतले बोलेका थिए ।
